Сенаторлар журналистермен кездесіп, электроэнергетика саласының мәселелерін талқылады

Сенаттың Әлеуметтік-мәдени даму және ғылым комитетінің депутаттары «EL ARNA» телеарнасында болды.

Сенаторлар кездесу барысында журналистермен және телеарна басшылығымен бірге мемлекеттік идеологияны қалыптастырудағы бұқаралық ақпарат құралдарының рөлі мен маңызын талқылады.

«Біз жастарды тәрбиелеуге ерекше назар аударуымыз керек. Біздің комитет бұл мәселені үнемі көтеріп келеді. Қазір бұл салада көптеген жұмыстар атқарылуда, заңдар қабылдануда, жастардың материалдық жағдайын жақсартатын жақсы мемлекеттік бағдарламалар бар. Бірақ біз идеологияны ұмытпауымыз керек. Бұқаралық ақпарат құралдарының бұл бағыттағы рөлі аса маңызды», - деп атап өтті сенатор Нұртөре Жүсіп.

«Хабар» агенттігінің Басқарма басшылығы сенаторларға «EL ARNA» телеарнасының алдында тұрған жұмыс жоспары мен мақсаты туралы айтып берді. Оның айтуынша, арнаның негізгі аудиториясы 14 пен 36 жас аралығындағы жастар болып табылады. Жастардың ой-өрісін кеңейту және қоғамның мәдени білім деңгейін үнемі арттырып отыру – олардың басты мақсаты.

Сенаторлар кездесу барысында көтерілген барлық мәселелер Сенат қабырғасында өткізуді жоспарлап отырған «Мемлекеттік идеологияны қалыптастырудағы бұқаралық ақпарат құралдары мен әлеуметтік желілердің рөлі» тақырыбы бойынша өтетін дөңгелек үстелге әзірлік барысында ескерілетінін атап өтті.

Сенаторлар: Электр энергетикасы саласындағы заңнама жетілдіруді талап етеді.

Сенат комитетінің Экономикалық саясат, инновациялық даму және кәсіпкерлік жөніндегі депутаттары Мемлекет басшысының «Халық бірлігі және жүйелі реформалар – ел өркендеуінің берік негізі» Жолдауын іске асыру аясында «Электр энергетикасы нарығын дамыту: Тенденциялар, проблемалар және оларды шешу жолдары» тақырыбымен өткен дөңгелек үстел ұсынымдарын орындау мәселелері бойынша отырыс өткізді.

Отырысқа Энергетика, цифрлық даму, инновациялар және аэроғарыш өнеркәсібі министрліктерінің, Атом және энергетикалық қадағалау және бақылау комитетінің басшылығы, сондай-ақ «KEGOC» және «Самұрық-Энерго» компанияларының өкілдері қатысты. Кездесуге қатысушылар ұзақ мерзімге арналған электр энергиясының шекті тарифтері, энергия өндіруші компаниялар тарапынан қарсы міндеттемелерді және жаңа ЖЭС салу мүмкіндігін мәселелерін талқылады.

Цифрлық даму, инновациялар және аэроғарыш өнеркәсібі министрінің орынбасары Асқар Жамбакин цифрлық майнинг субъектілерінің қызметін реттеу, салық салуды арттыру, электр энергиясын тұтынуға квота енгізу, бақылауды күшейту, сондай-ақ заңсыз майнерлерді анықтау және болдырмау туралы ойларын ортаға салды.

Кездесуге қатысушылар сонымен қатар енгізілетін электр энергиясын бірыңғай сатып алушының қызметін талқылап, оның жұмыс істеуі электр энергиясын сатып алу және сату кезіндегі алыпсатарлық операцияларды болдырмауға және нәтижесіз делдалдарды қысқартуға, өңірлер арасында электр энергиясына тарифтерді теңестіруді жүзеге асыруға мүмкіндік беретінін атап өтті.

Комитет төрағасы Сүйіндік Алдашев шара соңында электр энергетикасы саласындағы қолданыстағы заңнаманы жетілдіру қажеттігін атап өтті.

«Инвестицияларға айырбастау тарифі» саясаты бойынша алынған қаржының мақсатты пайдаланылуына уәкілетті органның бақылау функцияларын қайтаруды заңнамалық тұрғыдан қамтамасыз ету, егер көрсеткіштерге объективті себеп болмай қол жетпеген жағдайда айыппұл санкцияларын белгілеу, сондай-ақ қаржыны мақсатсыз пайдаланған жағдайда, оның ішінде кәсіпорын басшыларына да жауапкершілік тағайындау қажет», - деді Сүйіндік Алдашев.

Дереккөз: ҚР Сенаты